एमाले दोलखाको अध्यक्षमा गुरुङ प्यानलबाट श्रेष्ठ बिजयी, पोखरेल प्यानलका इश्वरचन्द्र पोखरेल पराजित
दोलखा, माघ २५ । नेकपा एमाले दोलखाको अध्यक्षमा एमाले पोलिटब्यूरो सदस्य तथा पूर्वसञ्चारमन्त्री पार्वत गुरुङ प्यानलका नरबहादुर श्रेष्ठ निर्वाचित हुनुभएको छ । आज सम्पन्न १०औं जिल्ला अधिवेशनको निर्वाचन परिणाममा प्रतिस्धर्पी आनन्दप्रसाद पोखरेल प्यानलका इश्वरचन्द्र पोखरेल र प्यानल बिहिन भरत दुलाललाई पराजीत गर्दै श्रेष्ठ अध्यक्षमा बिजयी हुनुभएको हो ।
श्रेष्ठले ३ सय ३३ मत प्राप्त गरी विजय हुनुभएको हो । उहाँले निकटतम प्रतिद्धन्द्धी इश्वरचन्द्र पोेखरेलाई ९५ मतान्तरका साथ पराजित गर्नुभएको छ । पोखरेलले २ सय ३८ मत पाउनु भएको छ । यस्तै अर्का उम्मेदवार भरत दुलालले ३८ मत मात्रै पाउनु भएको छ ।
बिजयी श्रेष्ठ ९औं अधिवेशनबाट पनि अध्यक्षमा निर्वाचित हुनुभएको थियो । यसपटक पनि पुनः निर्वाचित हुनुभएको हो । यसैगरी उपाध्यक्षमा राजेन्द्र मानन्धर बिजयी हुनुभएको छ । मानन्धर ३ सय ३६ मतसहित विजयी हुनुभएको हो ।
मानन्धरले प्रतिस्पर्धी हिरा थोकरलाई ७३ मतान्तरले पराजित गर्नुभएको छ । उपाध्यक्षका अर्का उम्मेदवार थोकरले २ सय ६३ मत पाउनु भएको छ ।
यस्तै, एमाले दोलखाको सचिवमा स्वयमवहादुर खड्का विजयी हुनुभएको छ । गौरशंकर गाउँपालिकाका संस्थापक अध्यक्ष खड्का ३ सय ४ मत प्राप्त गरी बिजयी हुनुभएको हो । खडकाले प्रतिस्पर्धी कृष्ण वस्नेतलाई २० मतले पराजित गर्नुभयो ।
यस्तै उपसचिवमा हरि ओली र कमला बस्नेत र्निाचित हुनुभएको छ । पदाधिकारीमा निर्वाचित उपसचिव ओलीबाहेक सवै अध्यक्ष श्रेष्ठ प्यानलबाट चुनावी प्रतिस्पर्धामा भाग लिएका नेता हुनुहुन्छ ।
अध्यक्ष श्रेष्ठ एमाले पोलिटब्यूरो सदस्य तथा पूर्वसञ्चारमन्त्री पार्वत गुरुङको निकट हुनुहुन्छ । यस्तै अध्यक्षमा पराजीत पोखरेल अर्का पोलिटब्यूरो सदस्य आनन्दप्रसाद पोखरेल निकट हुनुहुन्छ ।
दुवै नेताको समुहमा नपरेका भरत दुलालले निर्वाचनमा निकै थोरै मत पाउनु भएको छ । उहाँ प्यानलबिहिन रुपमा चुनावी प्रतिस्पर्धामा उत्रनुभएको थियो ।
