अनियमितता, भ्रष्टाचार र कुरीतिको बाहक एमाले हुन सक्तैनन : ईश्वर पोखरेल

काठमाडौं । नेकपा एमालेका वरिष्ठ उपाध्यक्ष ईश्वर पोखरेलले नयाँ  सत्ता समीकरणले सामाजिक सद्भाव कायम गर्ने तथा आर्थिक विकास तथा राष्ट्रिय स्वाभिमान जोगाउने बताउनुभएकाे छ ।
नेकपा एमाले उदयपुरको नवौँ जिल्ला अधिवेशन उद्घाटन कार्यक्रमलाई मंगलबार गाईघाटमा सम्बोधन गर्दै  पाेखरेलले नयाँ सत्ता समीकरण देशलाई नयाँ गति दिने दिशामा केन्द्रित भएकाे बताउनुभयाे ।  ‘नयाँ समीकरण मुलुकलाई सही दिशा दिने कुरामा लक्षित छ, हाम्रो योजनामा यो समीकरण बनेको हो, हामी यसलाई टिकाउन चाहन्छौँ, हामी यसलाई बचाउन चाहन्छौँ’, पोखरेलले भन्नुभयो ।
हिजोको गठबन्धन अस्वाभाविक गठबन्धन भएकोले भत्काउनु परेको पोखरेलले बताउनुभयो । सो गठबन्धन संविधानको मर्म र लोकतान्त्रिक मूल्य मान्यता विपरीत नीति र सिद्धान्त विहीन भएको उहाँले दाबी गर्नुभयो ।
सो गठबन्धन एमालेलाई सिद्ध्याउने नियतले बनेको उहाँले बताउनुभयो । ‘एमालेलाई सिद्ध्याउने आपराधिक योजना अनुसार त्यो बनेको थियो, हिजोको गठबन्धन एमालेलाई सिद्ध्याउने र एमालेलाई समाप्त पार्ने योजना अन्तर्गत बनेको थियो’, पोखरेलले भन्नुभयो ।
एमालेलाई सिद्ध्याउने योजना एमालेले असफल बनाइदिएको उहाँले बताउनुभयो । सबै दल मिल्दा पनि एमाले एक्लैले सर्वाधिक बहुमत ल्याउन सफल भएको पोखरेलले सुनाउनुभयो ।
पुरानो गठबन्धनको कारण राजनीतिक र सामाजिक सद्भाव बिग्रिएको, देशको स्वाभिमान गिरेको उहाँले बताउनुभयो । त्यसलाई सच्याउनको लागि पुरानो समीकरण भत्काउनु परेको उहाँले स्पष्ट पार्नुभयो । अहिले बाम गठबन्धन वा समाजवादी मोर्चा केही नबन्ने उहाँले स्पष्ट पार्नुभयो । अहिले जम्मा नयाँ समीकरणलाई अगाडि बढाउने कुरामा मात्र एमालेको ध्यान केन्द्रित रहेको पोखरेलले बताउनुभयो ।
पोखरेलले एमालेबाट निर्वाचित जनप्रतिनिधिले विकास निर्माण, उत्पादन बढाउने, रोजगारी बढाउने, स्वरोजगारी, सीप विकास लगायतको कुरा गर्दैनन् भने एमालेको पछाडि मानिसहरू नलाग्ने बताउनुभयो । ‘अब हाम्रो पार्टीको एजेण्डा भनेको विकास निर्माणको एजेण्डा हो’, उहाँले भन्नुभयो । नेकपा एमालेलाई जनताको बिचमा लोकप्रिय बनाउने हो भने विकास,  निर्माण, सिप, रोजगारी र स्वरोजगारी दिलाउने कुरामा ध्यान दिन जरुरी रहेको पोखरेलले बताउनुभयो । यसको लागि योजना बनाएर अघि बढ्नु पर्नेमा पोखरेलले जोड दिनुभयो । ‘यी मुद्दा उठाउन सकेन भने एमाले जनताको बिचमा स्थापित हुन सक्दैन’, पोखरेलले भन्नुभयो ।
भ्रष्टाचार र अनियमितताको विषयमा आवाज उठाउने पार्टी एमाले भएको पोखरेलले बताउनुभयो । भ्रष्टाचार र अनियमितताको घटनामा एमालेकै मान्छे संलग्न भए पनि त्यसका विरुद्ध आवाज उठाउनु एमालेको कर्तव्य भएको पोखरेलको धारणा छ । ‘भ्रष्टाचारको विरुद्धमा बोलिँदैन भने त्यो एमाले हुन सक्दैन, अनियमितता र बेथिति विरुद्ध बोलिन भने त्यो एमाले हुन सक्दैन, भ्रष्टाचार विरोधी अभियानको उद्घोष गर्ने नेता हो एमाले, अनियमितता र बेथितिको विरुद्ध बोल्ने नेता हो एमाले’, उहाँले भन्नुभयो ।
एमाले पार्टी कमिटीले कुरीति, अन्धविश्वास र कुसंस्कारको विरुद्ध आवाज उठाउनु पर्ने उहाँले बताउनुभयो । यदि राम्रो एमाले बनाउने हो भने यी अग्र पङ्तिमा उभिने शक्तिको रूपमा स्थापित हुनुपर्नेमा उहाँले जोड दिनुभयो ।
कोही पनि एमाले अनियमितता, भ्रष्टाचार र कुरीतिको बाहक हुन नसक्ने उहाँले स्पष्ट पार्नुभयो । त्यस्ता व्यक्ति केही दिन रहे पनि सधैँ एमाले भएर रहन नसक्ने पोखरेलले बताउनुभयो ।
पोखरेलले अहिले एमालेमा पार्टीको नेतृत्व र नीतिमा कुनै विवाद नभएको बताउनुभयो । त्यसैले जिल्लामा नेतृत्व चयनका सवालमा केन्द्रले कसैलाई टाढा वा नजिकको व्यवहार नगर्ने उहाँले स्पष्ट पार्नुभयो ।