वैज्ञानिकहरू नै आन्दोलनमा
काठमाडौँ । नेपाल कृषि अनुसन्धान परिषद (नार्क) का वैज्ञानिक कर्मचारीहरुले अदालतको आदेशअनुसार तलबमान कायम गर्न माग गर्दै आन्दोलनमा उत्रिएका छन् ।
विगतमा तलव ग्रेड समान रहेकोमा २०५७ साल श्रावण १ गते देखि प्रशासनिक समूहका केहि कर्मचारीहरुले आफ्नो समकक्षी वैज्ञानिक कर्मचारी भन्दा सिनियर हुन वैज्ञानिक एस-१ र एस-२ पद/तहमा नगन्य कर्मचारी भएको मौका छोपी परिषद् व्यवस्थापनलाई प्रलोभनमा पारी आफ्नो भन्दा वैज्ञानिक कर्मचारीहरुको तलबमान कम हुने गरी निर्णय गर्न लगाएको कारण वैज्ञानिक कर्मचारीहरु ले आन्दोलनमा उत्रेका हुन ।
२०८०/१२/१५ गते सम्मानित उच्च अदालत पाटन समक्ष न्यायको लागि मुद्दा दाएर गरेकोमा मिति २०८१/०२/०२ गते रिट निवेदक सरहका समान समकक्षी तहका प्राविधिक/प्रशासनिक कर्मचारीहरु भन्दा निज रिट निवेदकहरुलाई कम हुने गरी आधारभूत तलबमान कायम हुनु असमान र विभेदकारी भएकोले सम्बत २०८१/०४/०१ बाट लागु हुनेगरी रिट निवेदक सरहका समान समकक्षी तथा प्राविधिक/प्रशासनिक कर्मचारीसँग समान हुने गरी समानताको आधारमा तलबमान निर्धारण गरी कार्यान्वयन गर्नु गराउनु भनी विपक्षीका नाउँमा परमादेश जारी हुने ठहर्छ भनी परमादेश जारी गरे पनि कार्यान्वयन नभएको उनिहरूको भनाइ छ ।
यसरी विगतमा समान रहेको तलबमानलाई विगार्न देखि हाल अदालतको आदेश पालना गर्न नदिने प्रशासनिक कर्मचारीहरुको कारण निकम्बा बनेको परिषद् व्यवस्थापनले रजिनामा दिनु पर्ने, अदालतको आदेश तत्काल कार्यान्वयन गर्नु पर्ने, समकक्षी प्रशासनिक कर्मचारी सरह वैज्ञानिक कर्मचारीहरुलाई साधन स्रोतको वितरण गर्नु पर्ने र अनुसन्धान गर्ने उचित वातावरण सिर्जना गर्नु पर्ने उनिहरूको माग छ ।
