विकासका लागि बलियो सरकार सरकार गठन भएको छ : उपप्रधानमन्त्री पौडेल
रुपन्देही । उपप्रधानमन्त्री तथा अर्थमन्त्री विष्णुप्रसाद पौडेलले विकासका लागि राजनीतिक स्थिरता खोजेर नै यो सबैभन्दा बलियो सरकार गठन भएको बताउनुभएको छ ।
बुटवल उद्योग वाणिज्य संघको ७१ साधारण सभामा सोमबार बुटवलमा बोल्दै उहाँले यसबाट नागरिक र निजी क्षेत्रमा केही खुसी बनाएको र अब यो कार्यकालका लागि यसको विकल्प नभएको बताउनुभयो ।
‘यो सरकार बनेपछि निजी क्षेत्रलाई समस्या हुने कुनै निर्णय भएको छैन, केही समस्या समाधान हुने क्रममा छन्, अब निराश हुने होइन विश्वासको साथ व्यवसाय प्रवर्द्धनमा लागौँ’ उहाँले भन्नुभयो, ‘ मैले हरेक दिन निजी क्षेत्रका समस्या सुन्ने समय मिलाएको छु, यसले केही सहजता भएको छ । राजश्व संकलन, पुँजी लगानी, लगानीको वातावरण बन्दै गएको छ ।’
उहाँले यहाँ थालेका आयोजना पूरा भएपछि सहज हुने गरी काम भइरहेको, बुटवल नारायणगढ सडक, बुटवल गोरूसिंगे सडक, सिद्वबाबा सुरूङमार्ग, प्रादेशिक अस्पतालको आधुनिकीकरण र भैरहवा विमानस्थलले यश क्षेत्रको पहिचान बढाउने पनि बताउनुभयो ।
यो क्षेत्रमा निजी क्षेत्रले लगानी बढाएकोले पनि यसको भविष्यप्रति चिन्ता नगर्न मन्त्री पौडेलले आग्रह गरे । ब्याजदर घटे पनि ऋण स्थिति नबनेको विषयमा सरकारले अनुसन्धान थालेको उहाले बताउनुभयो ।
