दरबारमार्गमा आज एमालेले शक्ति प्रदर्शन गर्दै , लाखौं लाख कार्यकर्ता उतार्ने तयारी
काठमाडौँ-नेकपा (एमाले)ले आज (शुक्रबार) काठमाडौँमा जागरण सभामार्फत शक्ति प्रदर्शन गर्ने भएकाे छ। काठमाडौँ, ललितपुर र भक्तपुर जिल्ला कमिटीको आयोजनामा काठमाडौँको दरबारमार्गमा जागरण सभा आयोजना गर्न लागिएको हो।
जागरण सभा अघि बिहान ११: ३० बजे काठमाडौंको भद्रकालीबाट सुरु भएर शहीद, वीर अस्पताल, जमल हुँदै दरबारमार्ग पुग्ने जनाएकाे छ। दरबारमार्गमा हुने सभालाई अध्यक्ष एवं प्रधानमन्त्री केपी शर्मा ओली र महासचिव शंकर पोखरेलले सम्बोधन गर्ने तालिका रहेको छ।
देशमा केही भएको छैन भन्ने जबरजस्ती भाष्य बनाउँदै अराजकतावादीले निरासा छर्न खोजेको ठहरसहित सुशासन, मुलुकको समृद्धि र सुदृढ लोकतन्त्रको सन्देशका लागि कार्यक्रम आयोजना गरिएको एमालेले जनाएको छ।
जनप्रदर्शनमा एमालेका जनवर्गीय सङ्गठनहरू युवा सङ्घ नेपाल, जिफन्ट, अनेरास्ववियु, सम्पर्क मञ्चलगाय सबैजसो जनसङ्गठनलाई प्रदर्शनमा अनिवार्य उपस्थितिका लागि निर्देशन दिइएको छ।
