खुल्लामञ्च विक्री प्रकरण- उपमेयरले राजनिती गरेको मेयरको आरोप
काठमाडौं, १३ वैशाख, खुलामञ्चको सार्वजनिक जग्गामा अनाधिकृत रुपले सटर बनाई बेचेको बिषयलाई लिएर काठमाडौंका मेयर विद्यासुन्दर शाक्यले उपमेयर हरिप्रभा खड्गीले राजनिति गरेको आरोप लगाउनु भएको छ।
मेयर शाक्यका अनुसार खुलामञ्चमा बसपार्क राख्न दिएको सम्झौता भन्दा विपरीत गएर बनाइका नयाँ संरचनाको छानबिन गरि त्यसको रिपोर्ट पेश गर्न उपमेयर खड्गीलाई गत चैत २४ गते निर्देशन दिएकोमा उपमेयरले हाल सम्म रिर्पोट पेश नगरेको बताउनु भएको छ। प्रचलित कानुनले महानगरपालिका भित्रका अनाधिकृत निर्माण अनुगमनको अधिकार उपमेयरलाई दिएको छ ।
मेयर शाक्यले उपमेयर आफै खुलामञ्च रहेको वडा नं. २८ को बासिन्दा भएको नाताले खुलामञ्चमा संरक्षणको नैतिक दायित्व समेत हुनुपर्नेमा आफुले छानबिनको आदेश दिइ पटक पटक ताकेता गर्दा समेत बेवास्ता गरेको आरोप लगाउनु भएकोछ।
मेयर शाक्यले उपमेयरले आफ्नो जिम्मेवारी बिर्सेर कांग्रेस कार्यकर्ताको तहमा मिडियाबाजी तथा राजनीति गर्न थालेपछि उहाँको छानबिन प्रतिको उदासिनतालाई बाहिर ल्याउन आफु बाध्य रहेको बताउनु भएकोछ ।
