छायाँ सरकारको प्रधानमन्त्री पदमा किचलो
काठमाडौं, २४ बैशाख: नेपाली कांग्रेसले सरकारको निगरानी र अनुगमनको लागि गठन गर्ने भनिएको छायाँ सरकारको नेतृत्व कस्ले गर्ने भन्नेमा पार्टी भित्रका गुटका बिच विवाद श्रृजना भएको छ।
२०७५ मंसिरमा सम्पन्न भएको आम निर्वाचनको समीक्षा गर्न बसेको नेपाली कांग्रेसको संसदीय दलको बैंठकले प्रतिपक्षमा रहेर प्रभावकारी भूमिका निर्वाह गर्ने निर्णय गरेसँगै सरकारका काम कारवाहीको सुक्ष्म निरीक्षण र अनुगमन गर्नका लागि छायाँ सरकार गठन गर्ने निर्णय पनि गरेको थियो। तर, नेकपा सहअध्यक्ष केपी ओलीको नेतृत्वमा सरकार गठन भएको १५ महिना बितिसक्दा पनि प्रमुख प्रतिपक्ष नेपाली कांग्रेसले छायाँ सरकार गठन गर्न भने सकेको छैन।
डण्डा र झण्डा नपाउने भए पनि छायाँ सरकारको मन्त्री हुनका लागि कांग्रेस सांसदहरुमा तछाड मछाड चलेको कारणले गर्दा सभापति शेर बहादुर देउवालाई छायाँ सरकार गठन गर्न हम्मे हम्मे परेको छ। केही समय अगाडि कांग्रेस संसदीय दलको बैंठकले छायाँ सरकारमा सहभागी हुन् इच्छुक सांसदले आफुले इच्छाएको मन्त्रालय समेत उल्लेख गरेर निवेदन दिन आह्वान गरेको थियो।
एउटा मन्त्रालयका लागि पाँच वटासम्म निवेदन परेपछि सभापति देउवालाइ छाँया सरकार गठन गर्न अफ्ट्यारो परेको स्रोत बताउँछ।
साथै छायाँ सरकारको नेतृत्व कस्ले गर्ने भन्ने सम्बन्धमा नेपाली कांग्रेसमा चर्को विवाद रहेको स्रोत बताउछ। रामचन्द्र पौडेल र कृष्ण सिटौला छाया सरकारको नेतृत्व नयाँ पुस्ताका नेतालाई दिएर कांग्रेसले नेतृत्व हस्तान्तरणको सन्देश आम जनतामा दिनुपर्छ भन्ने मत राखिरहेका छन भने सभापति देउवा भने छायाँ सरकारको नेतृत्व पनि आफैले गर्ने पक्षमा रहेको स्रोतले बतायो। यिनै विविद कारणले गर्दा पनि प्रमुख प्रतिपक्ष नेपाली कांग्रेसले अहिले सम्म छायाँ सरकार गठन गर्न सकेको छैन। (यो समाचार साघुँ साप्ताहिक बाट लिइएको हो)
