गढीमा उभिँदा नेपाली वीरताकाे गौरवपूर्ण अतीत पुन: स्मरण गरायो : मन्त्री बास्कोटा
काठमाडौं : सञ्चार तथा सूचना प्रविधि मन्त्री गोकुल बास्कोटाले रसुवाका जनप्रतिनिधि र सुरक्षा संयन्त्रका सदस्यहरूसँग आज रसुवागढी नाका अवलाेकन गर्नुभएको छ ।
त्यस अबसरमा वहाँले ” नेपाल-चीन सम्बन्धलाई परस्पर लाभका आधारमा अझ घनिभूत बनाउन हामी प्रयत्नशिल छौं । गढीमा उभिँदा नेपाली वीरताकाे गौरवपूर्ण अतीत पुन: स्मरण गरियाे । ” भन्नुभएको छ ।
रसुवागढी नेपाल-चीन सीमानामा अवस्थित रहेको छ । यो एकसय पचास् बर्षभन्दा पुरानो ऐतिहासिक गढी हो। जंगबहादुरको पालामा भएको नेपाल-तिब्वत युद्धमा तिब्बतीहरूलाई हराएपछि नेपाली फौज गढीको बाटो हुँदै केरूङ र दिगर्वसम्म पुगेका थिए।
बिसं १९१२ सालमा यस गढीको निर्माण भएको थियो। यही गढीको नामबाट रसुवा जिल्लाको नामाकरण गरिएको हो। यो नेपाली इतिहासको साक्षी पनि मानिन्छ।
बहादुर शाह र जंगबहादुर राणाको पालामा तिब्बतसँग भएको लडाईमा यही गढीबाट नेपाली पुर्खाहरूले लडेर तिब्बतसँग युध्द जितेका थिए। प्राचीनकालमा नेपाल र भोटवीच चल्ने व्यापारको प्रमुख नाका थियो।
ठूलाठूला ढुंगा कुँदेर बनाइएको अग्लो पर्खालमा शत्रुलाई निसाना लगाउन स-साना ४७ वटा प्वाल र ६० फिट लम्बाई ६ फिट उचाई र ६ फिट चौडाईको गढीमा बसेर नेपाली फौज आफू सुरक्षित रहदै चिनिया फौजसँग चार पटकसम्म लडाई लडेका थिए।
