बाबुराम प्रतिपक्ष कि सत्तापक्ष?
काठमाडौ, ३० बैशाख: गत बैशाख २३ गते बाबुराम भट्टराईले नेतृत्व गरेको नयाँ शक्ति पार्टी र उपेन्द्र यादवले नेतृत्व गरेको संघीय समाजबादी फोरमका बीचमा एकीकरण भएर समाजवादी पार्टी नेपाल गठन भएको छ ।
उक्त एकीकरण तथा समाजबादी पार्टी स्थापनाको घोषणा अवसरमा अध्यक्षद्वय भट्टराई र यादवले आफूहरुले संयुक्तरुपमा नेतृत्व गरेको समाजवादी पार्टी वैकल्पिक राजनीतिक शक्ति हुने दाबी गरेका छन् । संघीय समाजवादी पार्टी नयाँशक्ति नेपालसँग एकीकरण भएर समाजवादी पार्टी गठन भएको भएपनि अहिले पनि समाजवादी पार्टी बर्तमान सरकारकै एउटा घटक दल रहेको छ । किनभने समाजवादी पार्टीका अध्यक्ष उपेन्द्र यादव यो सरकारमा उपप्रधानमन्त्री तथा स्वास्थ्यमन्त्री रहेका छन् । त्यसै गरि सह महासचिव मोहम्मद इश्तियाक राई शहरी विकास मन्त्री पदमा रहेका छन् । सरकारमै रहेको अवस्थामा अध्यक्षले नै आफ्नो पार्टी सरकारको वैकल्पिक राजनीतिक शक्ति हुने दाबी गर्नुलाई विचित्रको राजनीति मानिएको छ भने अहिले समाजबादी पार्टी सरकारमा छ कि प्रतिपक्षमा छ भन्नेमा पनि यो पार्टीका नेतृत्वले जनतालाई स्पष्ट पार्न जरुरी भएको छ । समाचार सूत्रका अनुसार साविक नयाँ शक्तिका संयोजक डा भट्टराई अध्यक्ष यादब र सहमहामन्त्री राई यो सरकारबाट तत्काल हटेर प्रतिपक्षमा आउनुपर्छ भन्ने अडानमा रहेका छन्। तर उपेन्द्र यादव भने सविंधान संशोधनका निम्ति सरकालाई समयसीमामा पनि संविधान संशोधन गर्ने क्रम अगाडी नबढे सरकारबाट हट्ने प्रस्ताव राखेर सकेसम्म सरकारमा लामो समयसम्म टिक्ने रणनीतिमा लागेका छन्।
संघीय समाजवादी पार्टी र नयाँ शक्ती एकीकरण भएर समाजवादी पार्टी गठन भएदेखि नै अध्यक्षद्धय भट्टराई र यादवका बीचमा यो विवाद सुरु भएको छ। (साभार-साँघु साप्ताहिक)
