ज्यान मार्ने उद्योगका आरोपीलाई छुटाउन नेपाली कांग्रेसको भातृ संगठनको प्रदर्शन
नेपाली कांग्रेसको भातृ संगठन तरुण दलको जिल्ला उपाध्यक्ष राधाकृष्ण भण्डारी उर्फ राधेको पक्राउको विरोध गर्दै तरुण दल, धादिङले प्रदर्शन गरेको छ ।
स्थानीय प्रहरीका अनुसार राधेलाई ज्यान मार्ने उद्योग अन्तर्गतको मुद्दामा बिहिवार पक्राउ गरिएको हो। उनको साथबाट छुरा समेत बरामद गरेको प्रहरीले बताएको छ । जिल्ला प्रहरी कार्यलय धादिङका प्रहरी प्रमुख एसपी राजकुमार बैदवारका अनुसार गजुरी गाउँपालिका–२ ताल्ती जाने बाटोमा स्थानीयहरुसँग झगडा गरिरहेको अवस्थामा राधे र उनका सहयोगीहरू सुजन लामा, विमल ठकुरी, काजी शाक्य, समीर थापा लाई समेतलाई पक्राउ गरिएको हो ।
ूप्रहरीहरुमाथि नै जाइलागेपछि हामीले पक्राउ गरेका हौँ, प्रहरी हवल्दार लालमणि शिवाकोटीको युनिफर्म च्यातिएको छ भने उनी घाइते समेत भएका छन् । उनीहरुको साथबाट एक थान छुरी पनि बरामद भएको छ,’ बैदवारले भनेका छन् ।
पिकनिक खाएर फर्किरहेका स्थानीयसंग धारामा फोहोर गरेको विषयमा विवाद हुँदा राधेको समूहले हातहतियार देखाउँदै स्थानिय महिला र बालबालिका माथि अभद्र व्यवहार गरेको, घटना थाहा पाइ घटनास्थलमा पुगेको प्रहरीलाई समेत राधेको समुहले कुटपिट गरेको प्रहरी प्रमुख बैदवारको भनाइ छ ।
उता तरुण दल जिल्ला समितिले विज्ञप्ती जारी गर्दै उपाध्यक्ष लगायत आफ्ना कार्यकर्तालाई २४ घण्टा भित्र रिहा गर्न चेतावनी दिएको छ ।
