माधव गुटको हालत चिचिलामै कुहिएको गट्टोजस्तो : अध्यक्ष ओली
काठमाडौं फागुन २१ : नेकपा एमालेका अध्यक्ष केपी शर्मा ओलीले माधव गुटको हालत चिचिलामै कुहिएको गट्टोजस्तो भएको बताउनुभएको छ ।
प्रेस चौतारी नेपाल प्रदेश नं १ को आज विर्तामोडमा आयोजित प्रथम अधिवेशनलाई सम्बोधन गर्दै ओलिले उक्त कुरा बताउनु भएको हो ।
ओलिले नेपाली कांग्रेस एमालेसँग लड्ने पाँच घटकमध्ये एक भएको बताउदै वर्तमान गठबन्धनमध्येका कसैले पनि आउँदो निर्वाचनमा एमालेसँग एक्लै मैदानमा आउने आँट गर्न नसक्ने बताउनु भयो । अध्यक्ष ओलीले लोकतन्त्रका निम्ति लामो सङ्घर्ष गरेको कांग्रेसले दक्षिणपन्थीको वैशाखी टेक्नु दुःखद् भएको आरोप लगाए ।
ओलीले माओवादी केन्द्र केही दिनमा सकिने भन्दै प्रचण्डले चिनामै सिद्धिने ग्रह बोकेर ल्याएको बताउनु भयो ।
उनले भने, ‘एमसीसी पास गर्नै नहुने हो तर एमालेले सिध्याउने भो भनेर प्रचण्डजीका कुरा सुन्छु। कहाँ एमालेले सिध्याउनु, उनले चिनामै त्यस्तो बोकेर आएका छन्, त म के गरौं।’
प्रचण्डले पार्टीको केन्द्रीय कमिटी बैठकमा एमसीसी ठीक थियो र त्यसका पक्षमा मत दियौं भन्न नसकेको भन्दै ओलीले यस्तो कटाक्ष गरेका हुन् ।
