तत्काल संसद भंग गरी निर्वाचनमा नजाने हो भने देश दुर्गतिको वाटोमा जाने एमाले उपाध्यक्ष पौडेलको ठोकुवा
सिन्धुली, १३ साउन । नेकपा एमालेका उपाध्यक्ष विष्णु पौडेलले तत्काल संसद भंग गरी निर्वाचनमा नजाने हो भने देश दुर्गातिको वाटोमा जाने ठोकुवा गर्नु भएको छ ।
प्रेस चौतारी सिन्धुलीद्धारा आयोजित पत्रकार भेटघाटमा बोल्दै उपाध्यक्ष उक्त कुरा बताउनु भएको हो । पौडेलले अहिलेको संसदले देशलाई निकास दिन नसक्ने ठोकुवागर्दै तत्काल निर्वाचनमा जानुपर्ने बताउदै गठबन्धन सरकारले संसदबाट पारित गरेको नागरिकता विधेयक विदेशीको इशारामा ल्याएको र यो सरकार विदेशीको कठपुतली भएको प्रमाणित भएको बताउनु भयो ।
तत्कालिन प्रधानमन्त्री तथा पार्टी अध्यक्ष केपी शर्मा ओलीले यो संसदबाट देशले निकास नपाउने भन्दै संसद विघटन गरी घोषणा गरेको निर्वाचनको औचित्य अहिले आएर गठबन्धन सरकारलेनै पुष्टि गरेको बताउनुभयो । पूर्वअर्थमन्त्री समेत रहेका पौडेलले सरकारले ल्याएको बजेटको नाटक र नागरिकता विधेयकले सरकार विदेशीको इशारामा चलेको थप पुष्टि गरेको दाबी गर्नुभयो ।
उहाँले बजेट बक्तव्यमा देखिएको तमासाले आम नागरिकमा सरकारको गोपनियतार विश्वास दुबै गुमेको बताउँदै तोकिएको समयमा संघ तथा प्रदेशको निर्वाचन नगराउने षडयन्त्र गरिरहेको आरोप लगाउनुभयो । एमाले निर्वाचन सार्ने गठबन्धनको षडयन्त्रको मुकाबिला गर्न तयार रहेको पनि बताउनुभयो ।
आगामी निर्वाचन स्वच्छ, निश्पक्ष र धाँधलीरहित भएमा नेकपा एमालेले बहुमत ल्याउने र नभएपनि देशको सबैभन्दा ठूलो दल हुनबाट कसैले रोक्न नसक्ने ठोकुवा गर्नुभयो । अर्थतन्त्रको परिसुचकले नेपालको अर्थतन्त्र अन्तन्त कमजोर रहेको र कुनै पनि विदेशी मुद्राको सञ्चिती सकिने बताउनुभयो । नेपालको अर्थतन्त्रले बस्तु र सेवा खरिद गर्न नसक्ने अबस्थामा पुगिसकेको बताउँदै एमालेले मुलुकको शासन सत्ता छोड्दा अर्थतन्त्र मजबुत रहेको उल्लेख गर्नुभयो ।
उहाँले विदेशीको इशारामा चलेको सरकारले देश गंभीर आर्थिक संकटमा पुर्याएको र यसको एउटै विकल्प एमालेको सरकार रहेको दाबी समेत गर्नुभयो ।
