सभामुखमा सत्ता गठबन्धनबाट एमालेका देवराज घिमिरेको मनोनयन दर्ता
काठमाडौं, माघ ४ । प्रतिनिधिसभाको सभामुखमा नेकपा एमालेका देवराज घिमिरेले मनोनयन दर्ता गर्नुभएको छ । बुधबार संसद् सचिवालयमा घिमिरेले प्रतिनिधिसभाको सभामुखका लागि मनोनयन दर्ता गर्नुभएको हो ।
एमाले नेता घिमिरेको प्रस्तावकमा सुवासचन्द्र नेम्वाङ र समर्थकमा राप्रपा अध्यक्ष राजेन्द्र लिङ्देन‚ रास्वपा सभापति रवि लामिछाने र नेकपा माओवादी केन्द्रका हितराज पाण्डे रहनुभएको छ ।
झापा २ बाट निर्वाचित भएर प्रतिनिधिसभा सदस्य बन्नुभएका घिमिरे ०५६ मा राष्ट्रिय सभा सदस्य चुनिनु भएको थियो । घिमिरे नेकपा एमालेको स्थायी कमिटी सदस्य हुनुहुन्छ ।
सभामुख पदमा एमाले र उपसभामुख पदमा राष्ट्रिय स्वतन्त्र पार्टीबाट उम्मेदवारी दिने सत्ता साझेदार दलहरूको सहमति रहेको छ । सभामुख पदको बिहीबार हुने निर्वाचनका लागि बुधबार उम्मेदवारी मनोनयन गर्ने संघीय संसद् सचिवालयको कार्यतालिका छ ।
