भ्रष्टाचार मुद्धामा दोषी ठहरिए कांग्रेस सांसद गुरुङ
काठमाडौं, फागुन १६ । नेपाली कांगेसका संघीय सांसद टेकबहादुर गुरुङ भ्रष्टाचार मुद्धामा दोषी ठहर भएका छन । भृकुटीमण्डपस्थित फनपार्कको जग्गा सस्तोमा भाडामा दिएर भ्रष्टाचार गरेको मुद्दामा कांग्रेसका सांसद गुरुङ दोषी ठहर भएका हुन ।
विशेष अदालतका अध्यक्ष श्रीकान्त पौडेल तथा सदस्यद्वय शालिग्राम कोइराला र बलभद्र बास्तोलाको इजलासले गुरुङलाई मतियारको रुपमा दोषी ठहर गरेको छ ।
दोषी ठहर हुनेमा तत्कालीन समाजकल्याण परिषदका उपाध्यक्ष प्रमोद मेहता, कोषाध्यक्ष कुन्जविहारी प्रसाद चौधरी, सदस्य सचिव रविन्द्र कुमार यादव, सदस्य मोहनराज शर्मा, मदनकुमार लाल कर्ण, हरि न्यौपाने छन् । अदालतले रमाइलो मेला सन्चालन गर्ने रविन्द्र गुरुङ र परिषदका निर्देशक मदन प्रसाद रिमाललाई पनि दोषी ठहर गरेको छ ।
बिशेष अदालतका प्रवक्ता दीपेन्द्रनाथ योगीका अनुसार यो मुद्दामा गुरुङसहित ९ जना दोषी ठहर भएका छन् । सजाय भने यही फागुन २५ सुनाइने अदालतले जनाएको छ । अख्तियार दुरुपयोग अनुसन्धान आयोगले २०७५ माघ २१ गते कांग्रेस नेता गुरुङसहित १४ जनाविरुद्ध भ्रष्टाचार मुद्दा दायर गरेको थियो ।
तात्कालिन मन्त्री महिला बालबालिका तथा समाज कल्याणमन्त्री बद्रीप्रसाद न्यौपानेको पालामा भृकुटीमण्डपको ६० रोपनी जग्गा प्रतिमहिना ५ लाख ५५ हजार भाडामा १० वर्षका लागि काठमाडौं फनपार्कलाई दिने निर्णय भएको थियो । गुरुङ भृकुटीमण्डप फनपार्कको मेला सञ्चालक थिए । सो काममा भ्रष्टाचार भएको अदालतले ठहर गरेको हो ।
